انا محجبه ليه

من طرف may be الجمعة يونيو 19, 2009 7:26 pm

" أنا محجبة ليه ؟ "

أنا محجبة - بعد إيماني بأمر ربنا إن الحجاب فرض على كل مسلمة - علشان الأسباب التالية:

1 - علشان انا حرة … مش من حق حد يشوف مني اللي مش عاوزاه يشوفه … ومن حقي اختار مين اللي يشوف مني أجمل ما عندي .. واللي علشان يشوف ده ويبقى حقه وحلاله بلاله عن طيب خاطر..

2 - علشان أنا غالية .. مينفعش أقلل من قيمة نفسي واخليها عرضة لكل العيون .. ويبقى خروجي مكشوفة ضوء أخضر لكل من هب ودب .. حتى لو مكنش ده قصدي … بس مش حقدر امنعه … (كامل اعتذاري لغير المحجبات.. ولكن ده اللي حيوصل منك لضعيفي النفوس حتى لو مكنش ده قصدك.. وده اللي علشانه ربنا فرض الحجاب . علشان ميطمعش الذي في قلبه مرض) … مع الأخذ في الاعتبار انه “كل من هب ودب ده” مش بس الشباب اللي بيعاكس البنات في الشارع .. ده يتضمن حتي الزبال اللي بيسوق عربية الزبالة في الشارع .. كل دول بقى من الممكن انهم يبصوا لي … لأ ده كمان يمكن ماعجبهمش ويدوروا وشهم إعراضاً

3 - علشان أنا باحترم نفسي .. وشايفة نفسي كبيرة قدام نفسي .. ومينفعش أنزل سوق المنافسة في الأنوثة علشان أفوز في الآخر بنظرة أو كلمة غزل أو عرض صحوبية…

4 - علشان انا جمالي مش خارجي وبس.. ومن حقي ان اللي ييجي يتجوزني .. ويشاركنى أحلامي وأفكاري .. واللي حخلف منه ولادي .. وحاربيهم معاه .. مايختارنيش على مقاييس شكلية وبس .. أو تبقى هي دي العامل الأساسي في أختياره ليا … علشان كدة مش ضروري يشوفني في كامل زينتي وجمالي قبل ما ي! تجوزني . . الأهم انه يحب روحي ويعجب بشخصيتي .. ويرتاح معايا نفسياً.. (أصل في بنات بتأجل الحجاب لحد ما تتجوز.. على أساسا انها تكون شنكلت واحد وضمنته.. مع إن مفيش حاجة مضمونة في الزمن ده .. واللي اختارها علشان جمالها .. ممكن قوي يتجوز عليها واحدة أجمل منها.. لأنه أكيد في الأجمل منها يعني)..

5 - علشان أنا باخاف على أخويا في الله اللي بيشوفني في الشغل أو في الكلية أو في المواصلات أو في الشارع .. ويمكن يكون عاوز يقرب من ربنا .. وبيجاهد نفسه علشان يغض بصره.. فمرضاش لنفسي اني اكون سبب في اني افتنه..

6- ده غير حاجة مهمة كمان … الكفن بتاع النساء.. فيه حجاب.. فاللي مش حتلبسه وهي حية بإرادتها طاعة الله.. حتلبسه كدة كدة وهي رايحة قبرها.. وطالما ربنا بيقول اننا نتستر حتى واحنا رايحين قبورنا وخلاص انتهى التكليف … ومحدش حيشوفنا تاني ولا حد حيطمع فينا .. يبقى مفيش معنى اننا نمشي مكشوفين لكل العيون واحنا أحياء نرزق.. يبقى الأولى اطيع ربنا بإرادتي وأقابله وهو راضي عني واخد أجري كامل.. ولاّ اني ملبسوش غير وانا جثة واقابل ربنا وهو غضبان عليا؟

والأسباب اللي فوق دي .. هي اللي فهمتني ليه ربنا فرض علينا الحجاب.. مش تعسير ولا تضييق .. الحجاب فعلا عزة وكرامة.. ميعرفهاش غير اللي داق طعم الستر..

ربنا يهدينا ويهدي بنات المسلمين

من طرف rora tag الجمعة يونيو 19, 2009 7:59 pm

جزاكى الله خيرا يا ماى بى على الموضوع الرائع ده
و أنا بحب أوى المقارنة دى ::: بين اللؤلؤة و الزهرة

اللؤلؤة :::
اللى عايزها لازم يكافح علشان يوصلها ( يتعلم الغوص و بعدين يقعد يدور فى أعماق البحار عن المحار و بعدين بعد تعب يلاقى محارة يطلع بيها فوق السطح و بعدين يفتحها و يلاقى جواها لؤلؤة جميلة جدا و أجمل ما فيها إنه تعب علشان يجيبها و بعد كده بياخدها بيته و يحافظ عليها لأنه تعب علشانها و لأنها غالية جدا و متقدرش بثمن ده غير إن اللؤلؤة هتفضل طول عمرها بنفس البريق و الجمال .....

الزهرة :::
اللى عايزها مش بيكافح كل اللى عليه إنه يروح أى جنينة أو حتى يمشى فى الشارع و هيلاقى ورد كتير يختار اللى شكلها و ريحتها حلوين و يقطفها و يقعد يشم ريحتها و يستمتع بجمالها لحد ما يلاقى زهرة تانية أحلى منها فيرميها و يقطف الأحلى و هكذا لأنه متعبش علشانها و لأنها رخيصة جدا ده غير إن الزهرة كلها يوم أو اتنين و تذبل و لونها يتغير و ريحتها تروح ....

أتمنى تكون وجهة نظرى وصلت .... و مع احترامى لكل اللى مش محجبات

من طرف mzm_1991 الجمعة يونيو 19, 2009 11:37 pm

جزاكي الله خيرا يا ماي بي
وحلوه اوي المقارنه بتاعتك يا رورا

من طرف محمد السيد السبت يونيو 20, 2009 2:52 pm

عشرة على عشرة ياريت كل البنات بتفكر زيك

من طرف nourgy السبت يونيو 20, 2009 3:15 pm

بجد الكلام حلو اوى و بصراحه انا اول مره اعرف عن موضوع الحجاب فى الكفن دا

والمقارنه اللى انتى عملتيها يا رورا صح جدا لان اللى بيجى بالساهل بيضيع بالساهل