رباعيات من تأليفي

رباعيات من تأليفي



كل يوم بييجي من بعده يوم جديد
بنقابل ناس كتيرة ، قلب طيب وقلب حديد
تحب حد النهاردة ، وبكرة الايام تنسيك
لكن لوحبك كان حقيقي .. عمرك ماهتحب جديد
وعجبي ...



أيام بتعدي غريبة برد وشتا وخوف
متمسكين بالدنيا ليه ، واحنا فيها ضيوف!
كلها كام يوم ونمشي وربك اعلم بالمصير
مين فينا قلبه حجر؟ ، مين فينا مات م الخوف؟
وعجبي ...



النهاردة يوم مش طبيعي برد وشتا ورياح
مليت انا م الدنيا ، ونفسي منها ارتاح
بجد انا تعبان ، وزهقت من لياليها
ناس عايزة تعلى اوي ، وناس نفسها ترتاح
وعجبي ...



أمشير ده شهر غريب ، ياما قالوا عنه حكايات
يوم حلو ويوم مش طبيعي ، يعني ساعات ساعات
ويوم الشمس طالعة والدنيا بتشتي بغزارة
زي الحب ف مزاجه .. حلو بس بحالات
وعجبي ...



الانتظار شيء جميل مع انه شيء ممل
ويابختك بصاحب يشرفك وياويلك من واحد يزل
الدنيا اصلها كبيرة و مليانة من كل لون
مع ان الاحزان مش يامة بس الافراح اقل
وعجبي ...



اعرف انا انسان ( من بنت حلوة اتحب )
وناس كتير عشقوه ، وهو من غير قلب
يجرح قلوب الناس ، عايش ولا ع البال
أصل حب الزمن ده مش حب صادق ده كدب
وعجبي ...



يا حزن مالي القلوب قولي ايه النهاية؟
مالي عيون الأحبة بالدمع كتبوا الحكاية
الحزن يامة أوي أكتر من الأفراح
حزن وبركان غضب .. والدمعة كانت بداية
وعجبي ...




************************************
اكيد كلنا عارفين الرباعيات بتميل للعامية شوية
وكلنا اكيد قرينا لصلاح جاهين كاتب الرباعيات العبقري

اتمنى من الله ان تنال كلماتي اعجابكم
مع تمنياتي لكم بقضاء اسعد الاوقات
************************************