الرساله دى مهمه عشان اللى عايز يعرف معلومات عن الاقسام

ولا احنا اسفين لان الموضوع ده جاء متأخرا جدا بعد ما مليتوا استمارت الرغبات

حبايبى واخواتى فى الجروب لازم تقروا التوبيك دى علشان تحددوا انتوا ناويين تخوشوا قسم ايه
ومعلش حاتقل عليكم شوية وابقوا قولى ليا ايه رأيكم فى الموضوع ده

ميكانيكا

1. طبعا اجمل قسم فى الهندسة.... اللى يدخل ميكانيكا لازم يعرف انة قسم صعب جدا بس لو حتحبوا حيكون لذيذ جدا......
2. لو عايز تدخل ميكانيكا لازم تعرف ان كتاب الفيزياء بتاع ثانوية عامة اللى درستة حتلاقى كل فصل منة بقى مادة ولا اثنين فى القسم وعلى فكرة مش معنى ان القسم اسمة ميكانيكا انك حتاخد ميكانيكا لغاية لما تموت.... لا القسم اغلبة مواد فيزيائية و تصميم......
3. لازم تعرف ان قسم ميكانيكا اقوى و افضل قسم فى مصر على الاطلاق .... وانا بقول كدة من واقع الشغل والحياة العملية اللى برة الكلية.....
5. نطاق شغل مهندسين ميكانيكا برة كبير و مراتبتهم حلوة
6. ينقسم الى انتاج و صناعيه و ميكاترونيك
ميكانيكا(انتاج)

1.طبعا مجال الانتاج دة من اكثر المجالات الرهيبة جدا و اللى مش اى حد شغال فيها و مرتباتها عالية جدا طبعا لو طلعت مهندس فاهم و حتبقى استشارى فى حدود 7 سنين من تخرجك
2.ولازم تعرف ان انتاج اصعب قسم فيكى يا هندسة على الاطلاق..... وانك احتمال 85% حتسقط سنة ولا اثنين فى النص
3. الدراسة فية 50% انتاج..... والانتاج هوة بالضبط اللى اخذتوه فى اعدادي بس بتوسع كل باب من اعدادى بيكون نصف الكتاب
4. مجال العمل يكون فى المصانع و تشغيل الماكينات فى الورش الصناعية الكبيرة و احيانا فى مجال تاكيد الجودة.

ميكالكترونيك

1. قسم جميل يجمع بين ميكانيكا و الكترونيات فى دراسته
2. مجال عملة محدود فى مصر يعنى من الاخر فى الغالب حتطلع تشتغل فى ميكانيكا او الكترونيات مش الاتنين مع بعض زي ما هوة مفروض.
3. اما لوكنت حابب الموضوع وابدعت فية مش عايز اقولك انك حتبقى اية...

كهرباء

1.مهندس الكهرباء بيستلم من مهندس اميكانيكا و من المجالات اللى مجال شغلها واسع جدا زي ميكانيكا
2.و مواضيع دراستها تتلخص فى كل ما يخص الكهرباء و قليل من الالكترونيات.... يعنى لو مش فاهم كهربية اعدادى او حاسس انها تقيلة على قلبك.... اياك تدخل قسم كهرباء يااما للاسف ممكن ماتطلعش منه..!!!
3.حيكون نطاق عملك فى كل حاجة و اي شركة هندسية حتكون فيها مهندس كهرباء


اتصالات

1. لو حابب اتصالات و عايز تتدخلها و عندك حد يشغلك برة مصر....تبقى عبيط لو مدخلتهاش..... اما لو حتفضل جوا مصر فلازم تعرف ان مجال اتصالات ضيق للغاية و يكاد يكون منحصر فى شركات الاتصالات و المحمول و البترول فقط.... وشوف بقى كام الف مهندس اتصالات بيتخرج...
2. مواد اتصالات تشبة مواد كهرباء اوى لان اتصالات جزء من كهلرباء اصلا ...
3. اغلب مهندسين الاتصالات فى مصر بيشتغلوا فى الاخر يا اما مهندسين كهرباء او مهندسين كومبيوتر .... طيب ما تدخل كهرباء او كومبيوتر من الاول و لخص....

طبية

1.طبية هى عبارة عن خليط من مواد قسم ميكانيكا على كهرباء على مواد طبيه احياء و كيميا عضويه.... وقسم طبعا مش سهل...بس طبعا كلامى دة ميفرقش كتيير مع اللى حيدخلوا... دة حيكون من المتفوقين.....يعنى ياكل الزلط
2. طبعا مفيش غير حلوان و القاهرة اللى فيهم طبية يعنى اقل من 100 مهندس طبية كل سنة بيتخرج و دى طبعا ميزة
3.طبعا مفيش كلام على القسم.... بس واللى تجيلوا و مايدخلش يبقى عبيط.... بس ورينى يا حدق انت و هية حتجيبوا مجموعها ازاى

ميكانيكا باور

1. خليط بين قسم الميكانيكا و الكهرباء نفس المواد بتاعت القسمين و مجال شغله كويس جدا

عمارة

1. قسم عمارة دة بقى قسم البنات او الاولاد اللى بيحبوا يقعدوا وسط البنات...!!!! او المواهب طبعا...
2. القسم دة بنسميه تجارة هندسة علشان محدش بيسقط فية ولا حتى بيشيل مادة..... دة اللى بيجيب جيد....جيييد... بيعيط..!!!! ودة ميزة للى عايز ينجز و يخلص.
3. طبعا القسم دة المذاكرة فية قليلة خالص بس المجهود البدنى فية عالى جدا... يعنى لو كنتى بتاعة بابى و مامى ونونو.. متفكريش فى القسم دة خالص
4. يعنى ممكن ايام المشاريع تقعدى شغالة مثلا لغاية 12 ليلافى الكلية
5. لو عندك حس فنى و قدرة على الابتكار ادخل القسم دة على طوول... و لو عايز تدخلوا منظرة او علشان تفرح بالمسطرة اللى حتكون اطول منك ...بلاش.. مش حتسقط حتنجح برضة و حتجيب جيد.... بس حتتخرج من الكلية علشان تقف على "عمارة" تحرسها -بواب يعنى-
6. عيب القسم دة انه مجال عمله لا يسمح بوجود انصاف المواهب... يعنى لو عندك موهبة حتطلع تشتغل فى احسن الاماكن و بمرتبات خرافية.. بس لو موهبتك عادية حتشتغل بقرشين....
7. مواد القسم اغلبها رسم و مواد من قسم مدنى وهى مواد تتعلق بخصائص المواد و الانشائات و المساحة وحاجات بسيطة و لذيذة
مـــدنـى

2. القسم دة بقى جمع المعادلة الصعبة ومسك العصاية من النص...يعنى لا هوة صعب قوي زي ميكانيكا وكهرباء ولا هوة سهل اوى زى عمارة.....لا مجال عمله واسع اوى زى ميكانيكا و كهرباء و لا ضيق زى عمارة...و دى ميزة للى بيحب المعقول
3. القسم دة مشكلتوا ان تسليم الشيتات بيكون تقريبا اسبوعى طول السنة
4. و المواد فية كلها بقى خرسانة و طبيعة مواد و سدود و سكك حديد و مساحة و هندسة انشائية....
5. الفرق بين المهندس المعماري و المدنى ان الاول بيرسم و التانى بينفذ .... يعنى الاثنين بيسلموا لبعض
6.مجال شغلة مش بطال بس فية سنة بهدلة شوية
7. واللى نفسة يبنى عمارات و سدود و كباري و انفاق يدخل مدنى على طوول

كمياء

2. قسم انا شايف انة مالوش مستقبل لانك لا حصلت مهندس بترول و ولا جبت علوم قسم كمياء.... يعنى ممكن تدرس كمياء فى مدرسة خاصة لما تتخرج.
3.مواد دراسته تتلخص فى كتاب الكمياء اللى تخذته فى اعداداى حتلاقية بقدرة قادر بقى مواد و كورسات و كتب و اتمط و اتوسع و بدل ما حتخده فى ترم حتدرسه فى اربع سنين

نووية

1. القسم دة موجود فى هندسة الاسكندرية فقط....
2.طبعا قسم حكاية و رواية وشوف بقى المجال النووى والذرى فى العالم وصل لغاية فين فى جميع المجالات
3.لما تتخرج من القسم دة حتلاقى مستقبل مشرق فى المكان الوحيد اللى بيشغل بتوع الذرات فى مصر - مع الاعتذار لجورج سيدهم - الا و هو المركز القومى للطاقة النووية و طبعا مرتب رهيب حوالى173 جنيها و لما تتجوز حيراعوا دة وحيزودوك حوال 6 جنية .
4. اما لوحتسافر برة بالتحديد امريكا انسى بقى مصر لانهم مش حيخلوك تشفها تانى بس روح بقى هناك و تبقى عالم كبير و مش بعيد تعمل قنبلة نووية.... بس لما تقف على ديلك مش حترجع مصر تانى
5. مجال دراستها ينحصر فى الفيزياء الكلاسيكية -اللى زى اللى درستها فى اولى ثانوي- و الفيزياء الحديثة
طيران
1. موجودة فى القاهرة فقط.
2. قسم من الاقسام الداخلية لميكانيكا وطبعا مجال جامد و برستيج عالى جدا
3. ممكن تدخل ميكانيكا و تخلص و تعمل دبلومة فى الطيران و تبقى مهندس طيران قد الدنيا
4. نفس دراسة ميكانيكا بس مع التركيز على الايرو ديناميك بشدة..

قسم البترول و التعدين

1. هتتخرج هتبقى مهندس بترول قد الدنيا و بمرتب جامد جدا و يا سلام لو سافرت بقى بره مصر و يا سلام اكتر لو مهندس شاطر بره مصر هيدوك شقه و اقامه و تظبيط يعنى مرتبك كله فى البنك
2. بس ممكن اى مهندس تانى يروح يشتغل فى المجال ده و لو شاطر هيبقى احسن من بترول نفسه

السلام عليكم
انا حبيت اسال سؤال بسيط جدا واتمنى من صاحب الموضوع الرد
هو فيه هندسة طبية في الكلية
ولا انت بتتكلم على الصحية الي هي فرع من مدني

مشكووووووووور

يا جماعة للزميل اللى سأل هو فى هندسة طبية ................. ايوة يا جماعة كل الاقسام دى موجودة بس مش فى هندسة الاسكندرية دى الاقسام اللى موجودة فى جميع كليات هندسة فى مصر يعنى اللى حابب قسم مش موجود هنا ومجموعة جايبة ممكن يحول لية فى المكان اللى هو موجود فيها القسم دة

طب انا اعرف ازاي اني عندي موهبه عشان اخوش عمارة كل اللي انا اعرفه ان اكتر ماده بحبها في مواد هندسه دي هي الرسم ده بالاضافه الي اني لما درست مادة عمارة قدرات ثانويه عامه حبيتها جدا وكنت كويس فيها مش وحش............بصراحه انا كاتب عمارة اول رغبه وكلامك ده خوفني

انا جيبت 60% وكان نفسى فى كهرباء بس من غير دراسة ولا فهم و انا دلوقتى بفكر فى ميكانيكا وبدراسة بس الموضوعات اللى بشوفها فى المنتدى وبعض المنتدايات الاخرى مش كفاية نفسى شرح كافى علشان اشوف قدراتى تناسب الميكانيكا ولا لا يعنى موضوعات عن الدراسة والمواد وفرصة العمل

للاخ bahaa10 اولا الموضوع ميخوفش كدة عمارة عبارة عن ابتكار و ابداع و طبعا حب الرسم بس كدة لة انت بتحب تقعد ترسم كتيير من غير زهق وشايف ان قدرتك على ايتكار الرسومات (ليس تقليدها) اتكل على الله ........ و طول مانتا حابب عمارة اتكل على الله و ربنا معاك

الى اخى محمد الخولى هتلاقى معلومات اكتر فى كتب الدليل بتاع الكلية ان شاء الله .............بالتوفيق