بعض المبادئ و الحكم المفيدة

السلام عليكم و رحمة الله و بركاته

اهلا بيكم فى موضوعى هذا

كل واحد فينا ليه مبادئ و حكم و امثال ماشى بيها فانا حبيت اشارككم مبادئى
في منها انا سمعته و عجبنى و فى اللى انا اكتشفته مع مرور الزمن


ندخل فى الموضوع

1- بالنسبة للتعامل مع الناس الاول

1-1- لما تقابل حد و لاول مرة .. ابتسم و انتا بتسلم عليه ... يمكن تقول متفرقش , بس صدقونى دي بتعمل انطباع حلو اووووى عند الشخص اللى بتبتسم فى وشه حتى لو انتا مش حتشوفه تانى ( اضافة , بالنسبة ليا انا لو جيت اسلم على حد و حسيت انه مش حيبتسم زيي حسلم عليه بكل برود ... و اهلا بك فى البلاك ليست )
- النصيحة دي سمعتها من اخويا


1-2- لما تعد فى جماعة مع صحابك مع اهلك مع اى حد , متتكلمش كتير و خلى اى كلمة تقولها ليها سبب و اوزنها قبل ما تخرج .. مبقولش متهزرش بس قلة الكلام بتدى هيبة كبيرة للشخص دا و بتخليه غامض بمعنى اصح بتبقى كتاب مغلق و مش اى حد حيفهمك غير اللى حيتكلم معاك كتير و طبعا ... مش اول ما تتكلم تقوم ترغى كتير وتفضح نفسك ( زي ما بيقولو و دي مقولة جامدة جدااا " سكت دهرا فنطق كفرا ... " ) و زي ما الرسول صلى الله عليه و سلم بيقول " فلتقل خيرا او لتصمت "


1-3- الناس انواع و اصناف صنفهم بطريقتك و طبعا عاملهم كويس .. و حقول حاجة انا بعملها
عامل الناس كلها كويس , طبعا طول منتا مش خسران حاجة " لما تسيب انطباع كويس احسن من انك مستبش انطباع خالص"
مش معنى كدا انك تجرى ورا الناس , بس اللى تقابلهم بس و اللى تعزهم طبعا تبقى تسال عليهم


1-4- فى تلاتة انواع من الناس مبحبش اتعرف منهم حتى
1-4-1- الكدابين ... ( واحد يقولك امبارح كنت فى مصر و رحت سيتى ستارز و جبت التيشرت دا من هناك ... و التيشرت ميساويش 10 جنيه)
1-4-2- المتكبرين .. انا عندى عقدة من الناس دي , عمرى ما ااقبلهم.. انا متواضع ( زي منا شايف يعنى ) فيوم ما واحد يتكبر عليا , اناابعرف اعرفه مقامه كويس
1-4-3- المغفلين .... او بمعنى اصح ذو التفكير المحدود و الطفولى.. واحد مثلا عايش عشان يقضى اليوم او فاصل... لا تعليق


1-5- حاول تحط نفسك مكان الناس على طول , متخليش تفكيرك محدود , ولو كان عندك وقت و انتا عايز تعمل حاجة مع واحد حط نفسك مكانه بالمعطيات اللى انتا اديتهاله, دي حتديك رد فعل مقارب للى حينتج منه .. و مع مرور الزمن حتحس انك فاهم اغلب الناس


1-6- دائما توقع الاسوء... و دي طبقها فى كل حاجة مش مع الناس بس


2-بالنسبة بقا لنفسك ...


2-1- " رحم الله امرئ عرف قدر نفسه "
اعرف انتا مين و ابن مين الاول .. بعدين ابتدى اتعامل مع الناس من هذا المنطلق , بمعنى اصح لو ابوك وزير متتعاملش مع الناس كانك واحد سيس و لو مثلا على قد حالك ... متعملش ابن وزير .. خليك عايش فى مستواك و على قد حالك , حتنزل من مستواك حتندم , حتطلع اعلى من مستواك حتتعقد


2-2- مش معنى مثلا ان مستواك مش راقى "جدا" انك تفضل فى المستوى دا, حتى لو مستواك عالى انك تفضل على مستواك
دايما حاول تبقى احسن , مثلا لو انتا بتقدر تمشى 5 كيلو فى اليوم ( مثال يعنى ) ليه متخليهمش 6؟ لو انتا بتقرا جزء من القرآن كل يوم, ليه متخلهوش جزء و نص؟ ... و لو بتاخد 5000 جنيه فى الشهر ليه متطورش من نفسك و تاخد 6 و ان شاء الله 20 و 100 ؟ ؟؟ حفصل الجزئية دي فى النقطة الجاية


2-3- احنا اغلبنا مهندسين ( ولا اية ) , يعنى ان شاء الله حناخد بكالريوس هندسة , ليه مثلا متاخدش كورسات اضافية , كل قسم و ليه كورساته , بمعنى اصح لو انتا عايز تشتغل و تكون مستريح مكانك ليه تاخد كورسات على قد ما الشغلانة اللى انتا شغالها محتاجة ؟ ليه متاخدش زيادة , زيادة العلم و الشهادات مش بتضر بس بتفيد اكتر , و لما انتا بتكون على القد بيكون موضعك مش مستقر و بتكون اخر واحد نسبة انه يتطور و يترقى صغيرة " مع العلم انك لما بتكون عبقرى بتواجه عقبات اكبر... و اللى مش فاهم الجزئية دي يقولى"


2-4- خلييييييييييييييييك بااااااااااااااااااااااااااااااااااااااااااارد "زيــي"


5-2- ارضى باللى ربنا كتبهولك و اللى كتبه عليك " قل لن يصيبنا الا ما كتب الله لنا"
عايش فى بيت , مع اهلك و اخواتك و مستريح "نسبيا" ماديا و نفسيا , متقارنش نفسك بغيرك لانك مش بتشوف من غيرك الا الكويس , بس الوحش مبتشوفوش , يعنى مثلا يمكن تكون انتا مش مستريح , ما بالك ب واحد والده متوفى ؟؟ او ملوش اخوات او ... الطامة الكبرى .. يبقى والدته متوفيه ... او او او .. لو كملت فى الموضوع دا مش حنخلص
*بس الخلاصة , زي منتا شايف مثلا شخص عنده مميزات , فانتا متعرفش عيوبه .. او انتا متعرفش ربنا كاتبله اية بعد كدا..
احمد ربك على اللى انتا فيه , و دا ميمنعش انك تتطور و لما تشوف حاجة نفسك فيها مع واحد .. اوعى تحسده بس ادعى ربنا يكون عندك زيه و احسن كمان و ان ربنا يزيده " اظن ان اسم الحاجة دي الغبطة"
- و انا فى حاجة حصلت معايا بجد بحمد ربى عليها .. و لو واحد تفكيره محدود كان زمانه بقى فاشل دلوقتى
- كل شئ فى الدنيا ماشى بقدر ربنا .. يمكن يحصلك حاجة وحشة .. عشان قدام يحصلك حاجة احسن .. و ربنا مش حيضيعنا ابدا


2-6- حدد اهدافك .. من اهداف صغيرة .. لاهداف كبيرة .. اهداف الاسبوع دا .. الشهر .. السنة .. ال20 سنةاللى جاية
مش حقولك اكتبها بس حطها فى بالك و فكر فيها كل شوية .... " مش عايز اطول فى النقطة دي"


2-7- حاول تفكر تفكير منطقى ( احنا كمهندسين المفروض نفكر التفكير دا ) بس انا كان معايا الموضوع دا من زمان .. و الصراحة معرفش انا اكتسبته منين
التفكير المنطقى قصدى بيه انك يوم ما تحاول تحل مشكلة او موضوع فيه ثغرة ترجع للاساسيات و من الصفر و تبدا حبة حبة تفصفص الموضوع و تعرف الغلط فين ... و دا الفرق بين المهندس اللى بيصمم العربية .. و الميكانيكى اللى بيصحلها
الموضوع حيبقى اصعب طبعا , بس مفيش ولا مشكلة حتقف معاك , بس لو بتكروت ... اهلا بالمشاكل اللا نهائية


2-8- كلنا لينا اهداف .. و فى مثل غربى بيقول " الغاية تبرر الوسيلة" .... اوعى تطبق المثل دا!!! مرة و انا جي الكلية سمعت فى الراديو شيخ بيقول "درء المفاسد أولى من جلب المصالح" مش عارف اية علاقتها بس اهى معلومة دلوقتى و خلاص ( النبيه يفهم ) و دا الصراحة عاملى مشكلة صغيرة ...


2-9- كلنا عندنا مخ ؟ ولا اية ؟
يا ترى انتا شايف اية الفرق بين الفاشل و الناجح ؟ الناس بتقول العقل ... بس انا حقولك على عامل تانى اهم..


التفكير .. حاول تخصص مجال عملك او تفكيرك .. متفكرش فى 10 حاجات فى وقت واحد, بس فكر فى واحدة واحدة و ادى لكل واحدة وقتها بكده انتا حتحل اغلب المشاكل احسن ما تعد تفكر فيهم كلهم و حتضيع وقت كتير فيهم... عشان متبقاش زي المثل اللى بيقول " 7 صنايع و البخت ضايع " و دي حاجة غبية الصراحة " من وجهه نظرى طبعا "
ليه تعقد الدنيا و تعمل Mytee قصدى انشتاين


10-2- خليك واثق من نفسك , سيبك من اى كلام حد يقوله عليك , بمعنى لو كل الناس اجمعت انك فاشل دا مش معناه انك فاشل .. بس انا حقولك حاجة .. مش معنى كدا تقول انا ناجح و تعد باشا فى بيتكم و متذاكرش .. عارف انى بفرح لما حد بيستهزا بقدراتى .. عشان ان شاء الله حيجى يوم و حعرفه مقامه و اعرفه انه مش مقياس او عمره ما كان احسن منى "نقطة سودة"
الغرض من النقطة دي .. اعمل اللى عليك و سيبك من اى كلام حد يقوله عليك حتى لو كان دكتور و ربنا عمره ما حيضيع جهد حد كان بيشتغل بامانة فيه


2-11- عايز تعمل حاجة؟ فى بالك من زمان؟
روح دلوقتى اعملها
الكسل وحش.. اسالو شخص كسول زيي.. انا كانت فى حاجات كتير كان بيبقى نفسى اعملها بس بكسل , بس من فترة ابتديت اعمل اللى بيجى فى بالى , فى الاول حتتعب بس بعد كدا حتبقى عادة و حتستريح كتيير... مش حتحس بسلبية بعدها





كفاية مبادئ كدا دلوقتى .. الصراحة انا تعبت .. وتقلت عليكم انا عارف , بس الموضوع دا مش منقول و انا كاتبه كله .. و مظنش ان حد قلبه اسود زيي يعنى و حيكون موافقنى فى جميع النقاط .. يمكن انا مكتبتش النقاط السودة لسه

* لو عندك استفسار فى اى نقطة اتفضل اسال و انا مستعد للمناقشة

- انك تاخد مبدأ صح و تنفذه .. احسنلى من انك تخش تكتب مشكور و متطبقش الموضوع , بمعنى اصح انا كاتب الموضوع للافادة مش للشهرة -

* و المزيد قادم باذن الله

انا عاوزه اعلق علي نقطه البرود
انا قررت اني منفعلش ومتعصبش خالص عشان مفيش حاجه تستاهل بس للاسف حصلي الاسوء واني بقيت بكتم كتير اوي في قلبي وبقيت بعيط كتير وبدل ما كنت بتعصب وارد بقيت اعيط وبقت دي نقطه ضعف في جامده وفعلا انا بقيت ضعيفه اوي والناس كله لاحظت ضعفي واصحابي القريبين مني بقوا حاسين اني عندي لا مبالاه وبينتقدوني جدا في موضوع اني بعيط قدام الناس
وانا مقدميش حل من الاتنين يا اما اتعصب وارد اود اكتم جوايا بس دموعي حتنزل علي طول بدون تفكير وتقريبا خلاص كل الناس شافت دموعي دلوقتي.بس انا مش قادره اوصل لحل تالت انفذه

اول حاجة مفيش حاجة اسمها مستحيل
- مش حعمل مفتى بس حقولك انا حعمل اية لو كنت مكانك .. انا عن نفسى بكتم فى نفسى كتييير .. و بتعملى مشاكل ( مع نفسى بس ) بس انا يمكن اتعودت على الموضوع دا فبقت عادة , بالنسبة ليكى .. لو حاسة انك لازم تعيطى .. عيطى بس مش قدام الناس... امسكى نفسك و حبة حبة و ان شاء الله مش حتعيطى تانى قدام حد ... بس دا وحش للى حترتبطى معاه لو لقا قلبك جاف كدا
و مش لازم تبقى زيي , فى ناس عكسى تماما و كل واحد و ليه اتجاهاته

موضوع هايل من مجاميعة وبجد يمكن ثلاثة اربع اللي انت قلتة انا ماشي بية
واكتر حاجة اني مش بتكلم كتير ودة فعلا بيعمل هيبة وبجد كتير اوي بيقولولي انك غامض
اما بالنسبة للرضا فلازم نعرف ان كل انسان ربنا خد منه حد او حاجة معينة بيديلة غيرها
يعني ممكن يكون واحد والدة متوفي وهو متفوق والناس بتحبة وعندة ام كويسة والحاجات دة مش موجودة عند ناس تانية ابائها موجودة
فاذا فعلا لازم نرضي بنصيبنا

ونعم بالله

إيه ده يعنى أنا قلبى أسود
أصلى تقريبا موافقاك على كل النقط دى و بالنسة لموضوع القضاء و القدر أنا قررت إنه مادام ربنا موجود يبقى مش هقلق من حاجة و أكيد ربنا موجود على طول يبقى أقلق ليه ؟؟؟

لان فى غيرك بيقلق ...

انا يمكن ما اظهرتش النقاط السودة .. اللى جاية فى السكة

انتى لسه متعرفنيش يا رورا

الاسود جاي متقلقيش

يعنى أتصل بالاسعاف من دلوقتى

انت فعلا عندك حق
وانا موفقاك علي كل اللي قلته تقريبا
بس في حاجة الايمان بالقدر ده شئ عظيم بس مكسلش واكبر دماغي واقول اللي ربنا كاتبهولي حيحصل ده اسمه تواكل

تؤ تؤ , انتو يمكن متعرفوش ولا حاجة عنى .. مع انكو "شايفين انكم عرفتم عنى كتير " بس انا مريت بمراحل كتيرة ..

المقصود من النقطة دي... متحسبش ان حالك اصعب واحد فى الدنيا... و لو مريت ب ازمة استمر و متقولش خلاص انا قدرى كدا , حمثلها بمثال استاتيكى

لو انتا قوة .. و المقاومة زادت .. لازم انتا ( القوة ) تزيد عشان تتحرك و تتطور..

مشكورين على المرور يا احسن مهندسين

اولا / احيك

ثانيا / احب اقول لك انك مش لوحدك عندك نقط سوداء

ثالثا / كلامك صح

رابعا / موضوع البرود نفسى فى حبه منه لانى بجد بجد بتعب جدا وبتأثر نفسيا حتى ولو

حاجة متخصنيش ( يعنى لما بشوف حاجة غلط واكتر حاجة الامبالا اللى موجودة عند كتير

من الطلبة) او التفكير الضيق (كما قلت انت )

مشكور يا حامديتش


انا زودت نقطتين فى الاخر

تماااااااااااام