كرسى الاعتراف

بسم الله الرحمن الرحيم


كرسى الأعتراف سيقوم بأستضافة الأشخاص المرشحين انفسهم ... ما عليك هو كي ترشح نفسك في كرسي الاعتراف ان تكتب اسمك في الرد او تقبل الأستضافة ...
وبعد اختيارك .... وترتاح علي الكرسي سيبدأ الأعضاء بأستجوابك
*العضو الى هيرشح نفسه هيتم استضافته اسبوع وكل اسبوع هنستضيف عضو جديد
*كل عضو ليه الحق انه ميجوبش على 3اسئلة فقط
* الاسئلة متكونش عن حاجات خاصة جدا(العنوان-رقم التليفون)ده مرفوض والعضو ليه الحق انه ميردش عليها ومش هتتحسب من ضمن ال3 اسئلة اما باقى الاسئلة لازم العضو يجاوب عليها طالما الاسئلة ممستش حياته الشخصية ويا ريت يكون بصراحة

يلا اتفضلوا ادخلوا ورشحوا نفسكم ويا رب ترتاحوا على الكرسى

مع تحياتى
digitalelking

كده ميه ميه يا معلم

ونبدا مع اى حد

انا مبسوط ان الموضوع دة اتعمل وانا اول واحد برشح نفسي للكرسي

مي تو < Me too

و انا بعدك يا أسامه

ماشى يا محمد أكيد دلوقتى انت مستريح على الكرسى خد أول سؤال منى:

تعمل ايه لو شفت البنت اللى بتحبها مع واحد غيرك و هى لما شافتك راحت جايه مدوره وشها ؟
يعنى حتروح و تضربها قلمين كده و للا حتستنى لما تسيبوه و تبقى لواحدها و تسألها مين ده و يا ترى لو كان الاختيار التانى هل حتكون متنرفز أوى وللا عادى وللا ايه ، يا ريت توضح الاجابه

خد بقى شوية الاسئلة دول كمان
ايه لونك المفضل؟
مين اكتر مطرب بتحبه؟
مين اكتر ممثل بتحبه؟
ايه مفهوم الحب عندك؟
ازاى تفرق بين الحب والاعجاب؟
هل مستعد تضحى باى حاجة عشان البنت الى بتحبها؟
لو البنت الى بتحبها سابتك واتخطبت لحد تانى هتعمل ايه ويا ترى هتروح الفرح ولا ايه؟

بص سوالى هو

لما بننخنق وتبقى مضايق بتعمل ايه او بتروح فين

اولا انت بتقول البنت اللي انا بحبها مش اللي بتحبني لانها تفرق لو كانت بتحبني اكيد مش هتقعد مع اي حد علشاني وعلشان تحافظ علي مشاعري انا ولكن لو شفتها بتتكلم مع حد طبعا مش هروح اضربها قلمين ولا حاجة هكلمها لما يمشي لاني طالما بحبها يبقي لازم احافظ علي شكلها ادام الناس ومحرجهاش بس اكيد بردة هبقي متنرفز جدا بس مش هبين لان دة اصلا طبعي

لوني المفضل: السماوي
اكتر مطرب بحبة:عمردياب
اكتر ممثل بحبة :كتير لان مجالات التمثيل متنوعة بس اي حد بيمثل بجد وانا بصدقة يبقي انا بحبة
الحب عطاء بدون انتظار مقابل .الحب تضحية.الحب سلاح ذو حدين اما يخلي عندك قوة جامدة جدا تقدر تعدي بيها من مصاعب الدنيا اويهدك ومتقدرش حتي تتغلب عليه.الحب اجمل حاجة في الدنيا علي الاطلاق.الحب الحقيقي لابد ان يساندة العقل
الفرق بين الاعجاب والحب :انا عامل موضوع في القسم العام عن كدة بس الخلاصة ان اي حب بيبدا باعجاب لكن مش شرط كل اعجاب يتحول لحب
ممكن اضحي علشانها بعمري بس لو بحبها حب حقيقي

اكيد مش هروح الفرح وهحاول افتكرلها اي ايام حلوة عيشناها سوا بس بردة اكيد هبقي بتقطع مية حتة من جوة

لما بتخنق او ابقي مضايق مبطلعش من البيت بنعزل حتي عن اهلي في البيت ومبكلمش حد وبيبقي نفسي اعيط باي طريقة بس الكلام دة لفترة قصيرة وبعد كدة بفكر وبلاقي ان اي حاجة في الدنيا مهما كانت متستهلش ان الواحد يزعل نفسه عليها

امتى حسيت انك صغير اوييييي و امتا حسيت ان ليك قيمة كبيرة عند ناس؟

حسيت اني ليه قيمة كبيرة عند ناس لما دخلت كلية الهندسة وشفت فرحتهم
بحس دايما اني صغير لما بكون بعمل حاجة غلط وبكررها ومش قادر معملهاش بس بعد كل مرة بتحصل فيها الحاجات دة بحس اني صغير اوي اوي

لو اتخرجت و ملاقيتش شغل ( لاقدر الله ) هتعمل ايه ؟ يعنى حتفكر فى السفر وللا حتنتحر ( لا قدر الله ) وللا هتعمل ايه
وضح اجابتك بالرسم

والله ان اعندب اعتقاد ان الانسان اللي بيتعب وبيدور دايما ربنا بيوفقه وبينجح
وبعدين انا اصلا نفسي اسافر من غير حاجة يعني مش مستني لما ملقيش شغل الفكرة موجودة من الاول
بس لو بعد كل دة ملقتش شغل بالشهادة
هدور علي اي سكة بتجيب فلوس (مخدرات_غناء _فتونة )اي دهية تجيب فلوس وخلاص

اية يا جماعة هو انا كنت خروف العيد اللي هتضحوا بية ولا اية
مفيش حد هيرشح نفسه ولا اية

انا هنا أهو
بس أسامه قال انه هو اللى عليه الدور

الاسبوع ده هنرشح اسامة والاسبوع الى جاى هنستضيف علاء

يلا يا اسامة خد منى شوية الاسئلة دى
ايه مفهوم الحب عندك؟
لو انت ماشى فى الطريق ولقيت بنت زى القمر قاعدة بتعيط هتروح تسالها مالك ولا هتنفض وتمشى؟
بتفضل مين فى المثلين؟
لو واحد صاحبك عمل معاك موقف مش بيس هتعمل معاه ابه؟
كلمنا عن نفسك شوية.......................................

اه يا أسامه كامنا عن نفسك شويه
وضح اجابتك بالرسم

هاي اسامة عندي سؤال
لو في بنت بتحبها اوي ورحت وقلتلها وقالتلك مش هينفع لاسباب اخلاقية هتعمل ايه؟

digitalelking كتب:يلا يا اسامة خد منى شوية الاسئلة دى
ايه مفهوم الحب عندك؟
لو انت ماشى فى الطريق ولقيت بنت زى القمر قاعدة بتعيط هتروح تسالها مالك ولا هتنفض وتمشى؟
بتفضل مين فى المثلين؟
لو واحد صاحبك عمل معاك موقف مش بيس هتعمل معاه ابه؟
كلمنا عن نفسك شوية.......................................

اهلا و سهلا يا ديجيتال كينج الاول
بالنسبة للاسئلة بتاعتك
مفهوم الحب عندى ... انا مش حفتيلك بس شايف ان الحب هو علاقة متقدمة لازم كل طرف فيها يحافظ على الاخر فيها و على شعور الطرف الاخر بحيث يعمل كل حاجة هوا بيحبها و ميعملش حاجة تزعله
السؤال التانى
لو البنت زي القمر دي اعرفها و تعرفنى ( شكلا بس ) حروح اكلمها و اشوف مالها
لو اول مرة اشوفها حتصعب عليا اه .. بس لو انا رحت كلمتها ؟ اهلا بالشعب حيجى هوا كمان
انا مبروحش اكلم بنات معرفهاش ( بالعافية بكلم اللى بشوفهم كتير )

بالنسبة ل صاحبى ف على حسب الحركة , و انا اى حد يعمل حاجة قاصد يزعلنى بيها ... انا بعرف ابيع كويس

asmaa كتب:هاي اسامة عندي سؤال
لو في بنت بتحبها اوي ورحت وقلتلها وقالتلك مش هينفع لاسباب اخلاقية هتعمل ايه؟

حلو السؤال دا يا اسماء ( المشكلة انا خايف اصلا من الموضوع دا )
البنت اول شئ حتكبر فى عينى , بس مش عارف لازم اعرفها انها هيا الوحيدة اللى حتبقى فى بالى و عايز اكون فى نفس مكانها عندى عندها ( يعنى اكون انا الوحيد اللى فى بالها ) و لو وافقت خلاص انا حسيبها لحد ما ابقى مستعد و اروح اتقدملها ... رفضت مش عارف حعمل اية ساعتها

اى حد عنده سؤال تانى يتفضل

سؤال توضيحي فقط
يعني انت مش مؤمن بأن البنات تكلم ولاد لانها بتسقط من نظرك لمجرد قبولها الكلام معاك والابتشك في اخلاقها ؟
جاوب بصراحة

هبه سوسو كتب:سؤال توضيحي فقط
يعني انت مش مؤمن بأن البنات تكلم ولاد لانها بتسقط من نظرك لمجرد قبولها الكلام معاك والابتشك في اخلاقها ؟
جاوب بصراحة

... انا مقلتش ان البنت بتسقط من نظرى اول ما بكلمها و بتتجاوب معايا بـــــــس لما بترفض بتكبر فى عينى لان دا ان دل على شئ فيدل على ادبها , و لو اتجاوبت معايا يمكن تكون منجذبة ليا زي ما انا من ناحيتها ..

انا بحاول معملش اى حاجة غلط تظهر للناس انى مش كويس و مش بختلط كتير بالبنات لانى.. مش حرضى كدا ليها برضه

و انا اعرف بنات بتكلم ولاد , طبعا فى حدود الادب و ميبقاش كوسة ( زيادة عن اللزوم يعنى ) و محترمة

بتفضل مين فى المثلين؟

بحب احمد حلمى لان دمه خفيف و محترم , نور الشريف بحترمه برضه ومش فاكر حد تانى دلوقتى

بالنسبة للكلام عن نفسى

انا اسامة .. طالب معاكم فى هندسة اعدادى ( مأجل السنة اللى فاتت لظروف خارجة عن ارادتى ) , بحب اريح دماغى اوى... و مبحبش وجع الدماغ , لما بحب اعمل حاجة يبقى لازم اظبطها , النقطة اللى جاية دي شاكك فيها ان فى ناس بتقول عليا متكبر .. و انا ساعات بحس بكدا , بس انا بتكبر بس على اللى يفكر يتعوج عليا , واللى يحترمنى بحطه فوق راسى من فوق .. كفاية كدا دلوقتى


و اى حد عنده اى سؤال يتفضل